星期日一早, 準八時就到深圳大快活門口, 跟天馬之旅林生去東部華僑城, 雖然要交廿元報名費, 但物有所值, 最低限度唔似得上次咁盲摸摸, 唔知邊處有灯火般四處問路, 最後雖然係去得到目的地, 但已是中午沒多少時間遊玩了。
今次就唔同, 坐公車居然可以約時間開行, 仲唔使停站直達東華城入口車場, 可以見得到林領隊係有啲辦法。
買票入場準備坐纜車上茶溪谷, 嘩！成個纜車站打哂蛇餅, 如果排隊的話, 起碼超過一小時, 領隊即時轉呔, 決定不坐纜車改乘旅遊巴上茶溪谷。 嗱！呢啲咪經驗囉, 避開人群, 不花無謂時間, 靈活輕鬆轉坐汔車上火車站轉乘森林小火車遊覽。 小火車是連接茶溪谷和大俠谷最佳路徑, 全長 六公里, 先後經過峽谷、山林、湖泊和錦繡花田, 係尋幽探奇回歸自然絕妙之旅。
遊畢, 由火車站廣場步行入茵特拉根建築群。 茵特拉根建築充滿中歐山地建築風格, 圓柱城堡, 斜頂房子, 色調和諧與大自然優美景觀完美結合, 置身在其中仿如進入童話般的世界之中不願出離。
沿小徑步行到茶翁古鎮, 眼前景物跟剛才所見完全相異, 全中國式的巿集, 古色古香, 有制茶的茶場、茶酒坊、各式各樣酒家、土家菜的食店, 應有盡有任你品嚐。
當中還有一個戲台, 有老倌正「拉闊」唱大戲表演, 隔鄰又有黃飛鴻醒獅表演, 真的看個不亦樂乎！餐後經茶溪棧橋進入濕地花園, 濕地花園係一個以花海觀景為主, 以大地藝術為特色的一個地區。人在花田猶如進入了仙境般夢幻世界之中。
