痛

文章日期：11/30/2012 09:31 pm

2012年11月29日   (四)     雨夜   

星期日, 貪玩之過, 在鶴咀機槍堡內, 穿越一個上頂井口, 井口周圍無繩無梯, 要靠雙手用力引體向上,
當身體上到一半時, 即時屈曲右腳頂住井口, 點知隻腳發力過猛, 哎呀一聲! 觸動右腳膝蓋外側舊患.
當時以為無事只係有啲痛, 繼續遊玩埋餘下行程. 晚上回家後查啲紅花油以為就無事.

點知到星期一差啲落唔到床返工, 膝頭痠痛又紅又腫, 一步一痛心, 要帶埋拐杖拐吓拐吓咁返工,
返到公司搵到支荳蔻花油, 睇吓用途, 原來可以治療筋骨扭傷, 今次有救啦, 拿拿聲即刻查,
果然隻腳鬆咗好多, 見支油咁有效當然由朝查到晚啦.

星期二, 星期三,照舊猛咁查, 似乎進展唔大, 隻腳上樓梯或落樓梯都係痠痛無力.

星期四, 收工後回家, 見隻腳仲係咁痛, 唔通真係要出動絕招 "針灸" 對付,
以我咁怕痛o既人, 淨係聽見"針灸"兩個字都覺得好痛.
但係, 唔攪好佢真係好唔掂, 不單只對工作有影響, 最重要係影響每個星期行山活動!
諗到呢度, 死就死喇, 要求"呀齊"幫忘拍幾針, 針後當堂好咗啲.

星期五晚, 食好飯, 沖好涼, 再針多次, 其實, "針灸"唔會好痛, 只不過係心理大於事實.